Стих на чеченском

Хьо кхийтира...

шен хьоме бен, бlара тlера боьхча,
чlегlаго шен гlайгlа йелхайора...
хьайн даг чуьра тешаман цlа доьхча,
и самукъа ахьа лелхадора...

дlо-о седарчий санна, дуьне мел ду
йаьржира хьан ойланаш... Хьо шеллуш,
йегайора гергабахча хáда
и хьайн безам, цхьаммо бинарг láда...

оьгlазалла–тlепинг, меттахъхьовра
хьан деган лам кхехкош... Ахь-м и ловра,
собаре а хилла бlаьрхиш муьйлуш,
цуьнан йовхо хала сица къуьйлуш...

ца хууш куьг кхетта чамин чуьра
морза lаьнча, лаьтто молу иза...
хьан сатийсам lовжош, цунна дуьра
шовра малий, дахаро цхьа къиза...

дешар сецча, горгали а бегош,
цхьа жимачу йоlа гуонаш туьйсу...
иштта гlийла шен хаьлла аз дегош,
тlаьххьара цкъа хьоьга безам хьуьйсу...

кlайчу говрахь некъ беш, хьан дог эца,
схьакхочу и къена дагалецам...
...схьакхочу хьан дерриг бlаьрхиш дакъош,
гучуйоккхуш хьуна сирла бакъо.

мохо техкош санна къона эрзаш,
меттахъхьовра и хьан бlаьргийн мерзаш...
кlайчу мархийн рема хи чохь йежаш
гича, цуьрриг хуьлура уьш къежаш...

цул тlаьхьа хьайн кийра бузош шийла
хlаваан мутт хьо йуьйлира мийла...
кула йуьйлуш, хьайн lиндагlах къехкаш,
хьо лелара, хьайна дохкуш бехкаш...

хьо кхийтира, дlа мел дахнарг хьалха,
хи чохь бlелиг санна дешаш хиллий.
кхийтира, хьайн безам хиларх малххал,
рицкъ дацахь, и къийсар эрна хиллий.

Минцаев lальви
30.05.2023 шо

Стихи